Homazhet në Presidencë, në nderim të presidentit të ndjerë Bujar Nishani, i cili u nda nga jeta në moshën 57-vjeçare në një spital të Gjermanisë, ku ndodhej për kurim, kanë bërë bashkë Sali Berishën dhe Yuri Kim.

Dy armiqtë e betuar publikë janë pozicionuar në krah të arkëmortit të Nishanit, mes disa të tjerëve të pranishëm.

Kryetari i Partisë Demokratike, Sali Berisha ka qenë në rreshtin e parë, krah ish-presidentëve dhe figurave të larta politike shqiptare nga Kosova e Maqedonia e Veriut.

Nga ana e saj, ambasadorja amerikane në Tiranë shikohet e ulur një rresht më pas. Yuri Kim ishte veshur me të zeza, duke respektuar traditën përkatëse shqiptare në kësi rastesh të dhimnshme.

Nuk dihet si janë ndier të dy, me shikimet e pamundura për të mos u kryqëzuar në sallën ku bëheshin homazhet ndaj Nishanit, por këto “koordinata” shumë të afërta iu kanë bërë përshtypje të gjithëve.

Duhet thënë se Berisha e ka fituar betejën me Kim në planin kombëtar, duke u rikthyer në krye të PD me zgjedhje, por “non grata” që e armiqësoi skajshëm atë me ambasadoren amerikane, ende qëndron në fuqi.

Megjithatë, pasi u thirr në Kongres para pak javësh, ambasadorja e SHBA në Tiranë i ka ndaluar deklaratat publike kundër liderit historik demokrat.